روايات وقصص

رواية مشاعر صادقة

رواية مشاعر صادقة بقلم الكاتبة نداء

الجزء الأول :
قاعدة قدآمي وشابكة إيديها التنتين ببعض.. ابتسامتها ما بتفارق شفايفها..
كنت قاعدة بتأمل بملامحها.. بتطلع عليهآ قديش حزينة.. حتى لو ضحكتها مالية وجهها.. بس قلبها حزين.. لمعة عيونها حزينة.. في شي جواتها إنكسر وعمرو ما بتصلح
هي البنت الحنونة البريئة يلي كانت عم تبني احلام وردية لحياتها ومستقبلها..
كل شي ضاع بالنسبة الها
قد ما نحكي نصيب وقدر وهاد يلي ربي كتبو لالها.. بس من جواتي بعرف انه عمرا ما رح تقدر تنسى ولا في شي رح يقدر يعوضا عن الشي يلي خسرتو..
ياربي.. شو فيني اعمللها !!
لو بقدر أعطيها روحي لأعطيتها
الي صار معها مو قليل.. الي صار كان اكبر من إنه تتحمله أي صبية بعمرها..
مافيني كون سعيدة وانا بشوفها هيك.. هي مو أختي.. هي قطعة من روحي..
بتذكر كل شي مرينا فيه كإنه لسا هلء عم يصير..
#قبل عآم ونصف //
بتول: مبسووطة وليه !!
بيان: هههههه اخرسي
بتول: هههههه لك شوفي وشك شلون صار الوان هههه الف مبروك ياقلبي
بيان: عقبالك يااختي
بتول: شووو لا حبيبتي اتركيني بحالي انا هيك مبسوطة وعايشة واخر روقان هههه
بيان: بالله شو هلء جد بتتمني تبقي هيك ع طول
بتول: طبعاً لك شايفتيني مجنونة لأتزوج هههه اترك هالدلال والحنان والعز ميشان روح لواحد اطبخله وانفخله واغسلله واكويله
بيان: ياقلبي الزواج مو بس هيك
بتول: ايه شو كمان!! تشطفي وتغسلي وتحبلي وتولدي وتتوجعي وتحردي و..
بيان: يييه لك اسكتي حرام الواحد يحكي معك شي
بتول: هههههه بدون ما تحكي هي هوا الزواج
بيان: لا مو هيك الزواج.. انت بس ماخدة جانب واحد من الزواج.. ومخداه بشكل سلبي.. لك الزواج رابط مقدس.. رابط بيجمع قلبين بيحبو بعض بالحلال..
لك الزواج عمره ما كان شغل وضب وكنس وخناق.. بس مجتمعنا هاد وظروفنا المأساوية بتخلي الحياة صعبة عالطرفين لهيك لازم نحنا نفكر فيه بشكل ايجابي حتى نعيش حياتنا صح
لازم تكون حياتنا مشتركة بكل شي بالشغل بالاعمال بالتربية بكل شي
بتول: اي كلامك فيه منه.. خلص ياستي ما بدنا نقعد نفتي هلء بالزواج المهم تكوني انتي سعيدة مع سامح
بيان: يارب ان شاء الله يااختي
بتول: وينا امي
بيان: عم تبرم مع خالتي ما انتي بتعرفيها هلء لساعتين ما بخلصو حكي
بتول: هههه ايه صادقة
بيان: خلص حلي بدي روح احكي مع سامح
بتول: لسا ما بلشناااا من هلء بتحلقيلي اي اركضي اركضي ههههه
راحت اختي تركض وطلعت عالاسطوح لتحكي مع خطيبها.. وانا رجعت كمل دراسة ع مكتبي
حطيت ايدي ع خدي وقعدت اتذكر كلام اختي عن الزواج
اطلعت ورايي ع تختي وتخت اختي وما اتخيلت كيف هالتخت هاد كمان شهرين بدو يصير فاضي
اتأملت بالغرفة يلي رح نام فيها لوحدي بدونها.. بدون صوتها المزعج وبدون شخيرها بالليل بدون خناقاتنا مين يرتب التخت ومين يطوي تيابنا..
///
انا بتول بنت فايعة وعصبية وعقلي صغير متل ما الكل عم يحكيلي..
طويلة كتير ورفيعة رغم اني باكل الاخضر واليابس وهالشي شكل الي اعداء واولهن اختي ههههه
شعري بني قصير وملامحي ناعمة وبشرتي حنطية.. بس بالمجمل اعتبر جميلة وجذابة جداً..
عايشة مع امي وابي واختي بيان
اختي الكبيرة عمرا 26 وانا عمري 22 نحنا وحيدات اهلي..
هلء رجعت اختي من المحكمة كتبت كتابا ع سامح.. حب عمرها يلي اتعرفت عليه بجامعتها وحبته وحبها وتكلل حبهم بالزواج..
مبسوطة كتير لاني عم شوف فرحتها مالية حياتها..
بالنسبة الي الزواج مو شي مهم ابداً.. وما بعلق امالي وحياتي كلها عليه..
الزواج بعتبره جزء من هالحياة.. اذا اجا اهلا وسهلا فيه.. ما اجا.. ما رح يأثر بشي..
بس اختي فكرتها غير
احلاما وامالها كلها معلقة بسامح..
من اول ما حبو بعض وهيا عم تحلم باليوم يلي يرتبطو فيه
بتحلم ببيت الزوجية بالسعادة بالاستقرار
بتحلم تجيب اطفال كتير حتى مجهزة كل اسماءهن..
يمكن هالشي مو غلط.. كل انسان عنده افكاره ومبادءه بهالحياة..
قطعت حبل افكاري يلي كنت عم اغرق فيه وكملت دراستي.. امتحاناتي النهائية قربت وانا كان لازم حط كل تركيزي فيهم..
بعد ساعتين متواصلين حسيت بجوع كبير ضبيت كتبي واطلعت بالساعة كانت 3 ونص.. كان وقت رجعة ابي من الشغل
طلعت لبرا الغرفة وبلشت نادي ع امي
بتول: مامااا ماماااا
امي: لك شووو فيه ليكني بالمطبخ تعي
بتول: ايه ياست الكل رح موت من الجوع شو عاملة اكل
امي: عملت محاشي
بتول: مممم اوولي ع قلبي رح اوقع من طولي
امي: اي يلا تعي جهزي معي هلء شوي وبيجي ابوكي
بتول: ليش وينها بيان
امي: شو بعرفني اكيد عم تحكي مع خطيبها
بتول: ايه ما بلشناا هلء رح تقضي طول الوقت تبرم وانا اتورط بالتحضير
امي: ايه بس ما حد يسمعك ويفكرك بتعملي شي بالبيت لك انتي بتفضحينا وبتلمي الحارة علينا لو حد قلك روحي رتبي الغرفة
بتول: ههههه حرام عليكي ياامي انتي هيك بتظلميني
امي: بظلمك!! الله يصبرني بس
بتول: موااه الله يعطيكي الصحة يارب وماتحتاجيني هههههه
امي: هههه اي يارب.. يلا يلا طلعي الاكل ابوكي وصل
بلشت اخد الصحون وطلعها لبرا وحطها ع طاولة السفرة
فات ابي عالبيت
ابي: السلام عليكم
بتول: وعليكم السلام يعطيك العافية بابا
ابي: الله يعافيكي يابابا
بتول: هات الشنطة عنك فوت غير تيابك رح نجهز الاكل
ابي: يرضى عليكي يارب وينا امك
بتتول: ليكا جوا عم تسكب الاكل
جهزنا الاكل واتغدينا سوا انا وامي وابي اختي بيان متل كل يوم ومتل كل سنة
الجزء الثاني :بقلم ندآء الصوالحي
كانت تمر الايام متل بعضا.. قضي وقتي بين الجامعة والبيت والدراسة.. وامي مشغولة هيا وبيان عم يجهزو بالتياب وتجهيزات الفرح
وابي بشغلو كالعادة
مر ع خطوبة بيان 3 شهور ونص وقضتها بسعادة وهنا.. كنت شوف الحب بعيونها
طول الوقت عم تحكي هيا وسامح وبييجي لعنا دائما وبتطلع هيا واياه و اوقات هيا بتروح لعندهن..
سامح شب محترم كتير وانيق.. بيشتغل هلء محاسب بشركة.. عايش هوا وامه واخوه الاصغر منه.. واختهم الكبيرة متزوجة وعايشة برا البلد هيا وزوجها.. .. مابعرفهن كتير بس بتخبرني بيان عنهم دائما
ابوه متوفي وعايشين مع امهم
باقي يوم لفرح اختي وانا كتير متدايقة.. فرحانة لانها رح تنزف لحبيبها وخطيبها والانسان يلي كانت تحلم تعيش معه حياتها.. بس متدايقة لانها رح تتركني لوحدي
ما بتذكر اني نمت يوم بلاها..
ما بتذكر انه افترقنا عن بعض اكتر من ساعتين باليوم
بس هلء خلص رح تتزوج وتتركني لوحدي بهالغرفة الكبيرة..
كنا نايمين كل وحدة ع تختا وعم نطلع بالسقف ولا وحدة فينا قادرة تغمض عيونها
بيان: بتول نمتي!!
بتول: لأ
بيان: زعلانة
بتول: لأ
بيان: توتووو
لفيت حالي عالحيط وبلشت ابكي..
مابعرف ليه هيك زعلت بس بجد مو متخيلة انه بكرة خلص رح نام بالوقت هاد لوحدي..
مع مين رح اضحك
لمين بدي احكي قصصي يلي بتصير معي
لمين بدي اقرأ النكت
مين يلي بدو يسشورلي شعري
من مين بدي تسرق تياب وشنط كل يوم وانا رايحة ع جامعتي
بيان: بتبكي ولييي.. خلص بحياتي ما تبكي.. والله انا رح اشتقلك اكتر.. اوعي تفكري لاني رح اتزوج خلص رح كون سعيدة وانسى اوقاتنا
والله مافي شي بالدنيا بنسيني اللحظات يلي قضيناها بهالغرفة
النا اكتر من 20 سنة بين هدول الحيطان
مافي شي بنسيني هادي الايام
بتول:…
بيان: بتعرفي توتووو
بتول: شو
بيان: رح صير اجي كل اسبوع نام عندكن ايه
ولما خلف بنتي رح سميها بتول ع اسم خالتها الزعرة هههه ورح نيجي انا واياها ننام هون ونفقعك ونطلع روحك
بتول: هههه اصلا رح تكون اغلى منك
بيان: تعي تعي حدي
مسحت دموعي وقمت عن تختي ورحت عندا تغطينا بحرام واحد وضلينا نتذكر اوقاتنا ونضحك.. نمنا ونحنا عم نضحك ونبكي
تاني نهار فيقتنا امي لنحضر حالنا ونروح عالكوافير
اخدت فستاني وفستان الفرح تبع اختي وكل غراضنا ونزلنا لتحت كان سامح مخبر بيان انه اخوه بده يوصلنا بسيارته عالصالون
بتول: يلا اختي انزلي خلص اتركي الغراض انا بشيلهن ريحي حالك اليوم هههه
بيان: هههه عم تتمسخري ايه خدي.. يلا استعجلي ايهم ناطرنا تحت
وصلت عالباب فاتت اختي بتول بالسيارة وبقيت انا حاملة الاغراض.. نزل شب منها.. كان جذاب كتير وفيه شبه كبير بينه وبين سامح
طويل وكتافه عراض.. بشرته بيضة وشعرو اسود..اله دقن كثيفة ومنظمة بشكل ملفت..
ايهم: عنك يا انسة
بتول: تسلم كلك ذوق.. خود هاد كمان
بيان: هي اختي بتول يا ايهم يلي خبرتك عنها
جحرت بأختي بيان.. لحتى ضحكت ولفت وججها عالشباك
ايهم: ايه النا الشرف والله
ابتسم واخد كل الاغراض مني وحطهن بشنتاية السيارة
طلعنا معو وطول الطريق وهوا يطلع فيني من مراية السيارة وانا اضرب ببيان واقرصها من خاصرتها حتى تحكيلي شو مخبراه عني

وصلنا الصالون وفاتت اختي قبلي وانا لفيت عند ايهم لاخد منه الاغراض..
ايهم: خدي ليكن كلهن.. بقي شي
بتول: لا خلص.. مافي شي.. يسلمو غلبناك معنا
ايهم: ولو تكرمي
بتول: عن اذنك
ايهم: شو بدي قلك
بتول: شو تفضل
ايهم: ممم فيني اخد رقم موبايلك يعني لو صارشي او احتجتو شي
بتول: لالا مو ضروري فيك تتصل ع بيان ليكو موبايلها معها
اطلعت فيه كيف وجهو صار الوان وانحرج.. لفيت وجهي وكتمت ضحكتي وفتت لجوا..
يوما كان متعب كتير.. خلصنا من الكوافير.. ورحنا عالصالة كانت بيان متل الملكة رغم انها مو هالجمال بس كانت روحها حلوة وابتسامتها بتسحر وكل شخص بشوفها بحبها وبتفوت القلب بسهولة..
الفرح كان حلو كتير ومنظم.. وكانت هيا وسامح طايرين ببعض..
التقيت ب ايهم كتير.. وباغلب المواقف صدفة نتلاقى بس كنت اتجاهله وغم اني شفت اهتمامه ونظراته الي..
ودعنا اختي رجعنا عالبيت.. قضيت الليلة بكي.. ما عرفت نام للفجر.. لحد ما تعبت وعيوني تورمو ونمت..
يوم عن يوم اتعودت ع حياتي لوحدي.. النوم لوحدي تيابي لوحدي عالاكل بس انا وامي وابي.. بلشت اتعود واستقر ع الوضع الجديد
بيان كانت مبسوطة كتير ودائما تيجي لعنا تسهر هيا وسامح واحيانا تنام عنا يوم.. واوقات نحنا نروح نزورها..
بعد شهرين من زواجها انصلت فيني الساعة 8 الصبح فيقتني من النوم
بتول: صباح الخير بيان شو فيه متصلة بهالوقت
بيان: صباح الفل.. حبيت خبرك اول وحدة ههه
بتول: لك شو فيه
بيان: ما في مبروك..انا حامل
بتول: يييه عم تحكي عن جد.. ريتو الف ميروك ياروحي.. يسعدلي هالصباح الي متل الورد
رح خبر امي
بيان: لا هلء رح سكر معك وانا بخبرها ههه رح تفرح كتير
اتصلت بيان بإمي وابي وخبرتهن وطارو من الفرحة.. فرحنا كتير بهالخبر يمكن لانه اول حفيد واو فرحة النا.. وكنا شايفين قديش بيان وسامح طايرين وفرحانين وعم يستنو البيبي ع نار..
بس احياناً الفرحة ما بتكمل..
وبتنتزع من جوات قلوبنا..
والي اكبر من زوال الفرحة.. المصيبة يلي بتصيبنا ع غفلة
بتعكر حياتنا وبتغير مسارها بليلة ويوم..
الجزء الثالث:
أول حملها كانت اختي بخير وصحتها تمام.. بلشت من اول اسبوع تحضر للبيبي وتشتري تياب وكل شي يعجبا للاطفال يكون عندا قبل ما تطلبو من زوجا او من امي او ابي ومن كل يلي حواليها..
بس لما فاتت بشهرها الثالث من الحمل بلشت تتعب كتير وصحتها تتراجع.. اولها كنا نفكر تعب وارهاق من الحمل.. بس تعبها وارهاقها زاد من لما اتصل فيني زوجا سامح المسا كنت عم حضر حالي حتى نام
رن موبايلي وانا عم غطي حالي بالحرام..
بتول: يو.. سامح! شبه متصل بهالوقت
مسكت الموبايل ورديت..
بتول: الو مسا الخير سامح
سامح: يسعد مساكي بتول كيفك
بتول: تمام الحمد لله.. خير فيه شي قلقتني!!
سامح: ايه والله في.. بعرف الوقت متأخر بس ما لقيت حد اتصل عليه غيرك قلت يمكن سهرانة عم تدرسي.. امي نايمة وخفت اتصل ع امك لازعجا
بتول: لك شو فيه قلقتني
سامح: ما بعرف بيان شبها عم تتوجع كتير وتعبانة مو عارف شو اعمللها
بتول: وينا هات لاحكي معها
سامح: خدي بيان احكي مع بتول.. لك خدي..
بتول مو قبلانة عم تقلي مو قادرة تحكي ولا شي
حاطة ايدا ع بطنعا وبتبكي شو اعمل
بتول: اولي عليي لك خدها عالمشفى بسرعة بلا ما يكون صاير للبيبي شي
سامح: لك مو راضية الي ساعة عم اقنع فيها بتقلي لا ما في شي بالبيبي بس انا بردانة
بتول: لا اله الا الله.. مو ع كيفها خدها بسرعة وانا هلء رح خبر ابي واجي
سامح: ايه ماشي
قلقت كتير ع اختي وحسيت قلبي بدو يوقف من الخوف.. قمت فيقت امي وابي وخبرتهن انه بيان تعبانة
لبسنا تيابنا ولحقنا سامح وبيان عالمشفى
اول ما وصلنا كان سامح قاعد لوحدو ع باب غرفة العمليات واختي جواها..
امي: سامح ابني شو فيه وينا بيان
سامح: اخ يامرة عمي.. والله مو عارف شي.. اول ما وصلنا فحصوها وخبرونا انه الجنين هالك ولازم نعمللا عملية بسرعة لانه صار معها نزيف حاد.. وليكها جوا
امي: لا حول ولا قوة إلا بالله.. يارب يارب
ابي: خلص وحدي الله يامرة ان شاء الله مابصير للبنت شي
امي: ربي يعوض ربي يعووض بس تقوم بخير وسلامة
سامح: يارب يامرة عمي ياارب
كنت راكزة ع الحيط وعم ابكي وتعبانة كتير بس بدي اطمن ع اختي وشوفها.. كنت خايفة عليها كتير..
بعد ساعة طلع الدكتور من الغرفة وطمنا انه بيان بخير نزلو الجنين وعملولها تنضيفات ووقفو النزيف وحالتها مستقرة حالياً..
اول ما فاقت فتنا لعندا.. كانت مرهقة وتعبانة كتير ووجها شاحب..
قربت لعندها ومسكت ايدها وبوستها
بتول: الف سلامة ياروحي
بيان: راح البيبي!
بتول: الله بعوض حبيبتي بكرة بتقومي متل الحصان وبتجيبي عشرة بدالو
بيان:…
بتول: بيبو خلص لشو عم تبكي عادي بتصير كتير اختي ما تزعلي ان شاء الله الشهر الجاي بتحبلي ع طول وبتجيبي بيبيات كتار
بيان: ان شاء الله….
بعد يومين رجعت اختي ع بيتها.. وبلشت روح لعندها كل يوم اخدلها الاكل يلي عملتلا اياه امي واعمللها بشغل البيت..
وانا طالعة ع درج البناية صادفت بوجهي ايهم كان نازل
ايهم: اهلا وسهلا بتول كيفك عاش من شافك
بتول: اهلين ايهم بخير الحمدلله كيفك انت
ايهم: تمام.. شو طالعة لعند بيان
بتول: اي جبتلا معي الاكل وبدي شوف شو لازمها بالبيت
ايهم: ايه خليني لكان اجي معك
بتول: ما عليك مشوار
ايهم: لا كنت نازل اتمشى شوي..
طلعنا انا وايهم سوا.. كان بيتهم عبارة عن طابقين.. الارضي كان حاصل فاضي وفوقه الطابقين.. طابق لام سامح وايهم وطابق لسامح وبيان
وصلت لعندا فتحلنا سامح الباب وفتنا انا وايهم
بتول: كيفها هلء
سامح: منيحة احسن من قبل.. فوت اخي اتفضل
بتول: انا فايتة شوفها
..
كيفو الحلو اليوم!!
بيان: اهلين اختي.. لك ليه بتضلي تعذبي حالك انتي وامي خلص والله مرة عمي ما بتقصر وسامح كمان
بتول: بتعرفي امك ما بهدالها بال الا وبعتاني كل يوم
بيان: هههه الله يخليلي اياكن
بتول: انا رايحة حطلك اكل.. ورح رتب البيت وشوف شو في شغل
بيان: ماشي اختي
فتت عالمطبخ طالعت الاكل وحطيته عالغاز ليكنه لحقني ايهم ووقف حدي..
ايهم: خليني ساعدك
بتول: ممم لا مافي شي بس بدي سخنه واسكبه
ايهم: ايه بسخنه عنك
بتول: مو مستاهل انا بسخنه
ايهم: طب بسكبه عنك
بتول: ههههه ايه خود انت سخنه واسكبه
ايهم: ههههه ايه والله هاتي وروحي انتي شوفي شو البيت محتاج..
كل يوم كنت روح لعند بيان نتلاقى انا وايهم.. كان يستغل الوقت ويضل معي بحجز انه بساعدني
اذا فتت عالمطبخ بلحقني وبساعدني اذا طلعت لانشر غسيل بييجي ينشرو معي.. اذا قعدت اطوي التياب بيقعد يطوي معي.. كانت علاقتي فيه عم تتطور كل يوم وبلشنا ناخد ع بعض كتير
..
صحة اختي اتحسنت كتير.. وانا خففت زياراتي عنها صرت روح انا واهلي كل كم يوم نطل عليها شوي..
بعد شهر من يلي صار اجت لعنا اختي وزوجها ونفسيتها كانت احسن بكتير..
قعدنا كلنا سوا شوي وضحكنا بعدا فاتت عالغرفة ونادت عليي
الجزء الرابع:
بتول: لك شو فيه ليه عم تصرخي
بيان: تعي تعي بدي خبرك بشي
بتول: شوو
بيان: شو رأيك ب ايهم
بتول: مممم
بيان: بلا اممم
بتول: شووو
بيان: ايهم معجب فيكي كتير واجا امبارح المسا لعنا وحكي معي انا وسامح عنك وخبرنا انه حابب يطلبك بس ليشوف رأيك بالاول
بتول: ايه عادي
بيان: شو عادي.. ايهم مافي منه تنين.. محترم ومثقف وجذاب ومو ناقصه شي.. لك احلى منك هههه
بتول: اي بس مو لهالدرجة
بيان: شو قلتي
بتول: ايه انا كمان بحس هيك في جاذبية بينا هههه ما عندي مانع
بيان: يعني خبره انك موافقة
بتول: ايه ما تقولي موافقة بلا ماما وبابا يرفضو
بيان: لا ما بيرفضو هني بيعرفو سامح ومرة عمي وبيعرفوه لايهم رح يوافقو اكيد
اختي خبرته اني موافقة.. وبعد يومين اجو لعنا سامح وامه وبيان ليطلبوني..
كان يوم محرج كتير بس حلو..
اهلي وافقو واتفقو معهن ع كل شي..
اتفقنا نكتب الكتاب ونعمل حفل خطوبة
بعد كم يوم رحنا عالمحكمة وكتبنا كتابنا ورجعنا ع بيت اهلي..
بتول: اتفضل فوت
ايهم: لك خلص مافي داعي خليني ارجع
بتول: بالله شو
ايهم: هههه خلص متل مابدك
بتول: اي تعا يلا.. ماماا ماماا
امي: اهلين ياروحي الف مبروك.. كيفك ياابني
ايهم: بخير مرة عمي الله يخليكي
بتول: لك ليه هيك خجلان هههه عادي
ايهم: هههه مو خجلان.. بس مو مصدق
بتول: بالله.. مو مصدق شو
ايهم: انك الي
بتول: لسا ما صرت الك
ايهم: لا الي ونص.. تعي وليه
بتول: هههه لك اسكوت هلء بييجي بابا يقلعك
ايهم: بالله!
بتول: عم امزح معك
خطوبتي انا وايهم كانت كلها اوقات حلوة.. حبنا لبعض كان عم يكبر بكل لقاء
وافكاري كلها عن الزواج والحب تبعثرت
هلء مستعدة اعمله اي شي.. بحبه كتير.. وبدي اغسله واطبخله واكويله بدي اعملله كل شي بدو اياه
لانه ما عم يقصر معي.. عم يشتغل ويجيب كل شي نفسي فيه
بياخدني ع احلى الاماكن وبجبلي احلى الهدايا..
فعلاً الحب شي تاني.. والزواج رابط مقدس بمعنى الكلمة
بعد شهر من خطوبتي كنا مختلفبن نعمل حفل خطوبة ولا لا.. قبل ما نفكر نحجز اختي رجعت تعبت كتير فجأة وصار معا نزيف..
فكرنا انه حامل او شي..
اخدناها عالمشفى وعمولا فحوصات.. بس هالمرة ما كان السبب حمل او غيره..
لما فتنا لعند الدكتور بعد ما ااعطيناه الصور والتحاليل.. خبرنا انه بيان عندا الياف بالرحم عبارة عن الياف سرطانية.. ولازم الرحم عندا ينشال باسرع وقت..
الخبر كان صادم كتير لانا.. انا وامي وابي ومرة عمي وسامح وايهم.. كلنا بكينا وانقهرنا وما عرفنا كيف بدنا نخبرها لبيان بهالشي
كلفوني بهالمهمة وانا ما فيني احكيلها كلمة تجرحها.. كيف بدي خبرها هيك خبر
سامح ما قدر يحكي شي من وقتا ومقضيها بكي..
كنت قاعدة بكفتيريا المشفى وعم ابكي ومو عارفة شو بدي احكي ولا كيف رح خبرها
اجا لعندي ايهم وقعد حدي
ايهم: خلص بتول اهدي والله كل شي نصيب شو بايدنا نعمل
بتول: اخ يا ايهم مافيني احكيلها مافيني تعبانة
ايهم: لكان مين يلي رح يخبرها كمان كم يوم العملية ولازم نخبرها لحتى تتفهم يلي رح يصير
بتول: لك شو خبرهاااا.. قلها انه معك سرطان بالرحم وبدنا نشيله منك.. بدن نشيل الرحم وما عاد تجيبي ولاد.. مستحيل تحبلي او تخلفي..
شو خبرهااا’!!!! لك احكي
خبرها انه احلامها كلها ضاعت.. وحياتها وقفت لهون خلص
ايهم: خلص اهدي اهدي بحياتي لا تبكي
بقيت ابكي لحد ما هديت وقررت خبرها بالي صار.. فتت لعندا عالغرفة كانت متمددة عالشرير ووجها تعبان
اول مافتت اطلعت فيني وابتسمت
بيان: تعي اختي اقعدي
بتول: كيفك هلء ياروحي
بيان: منيحة بس شو ماخبرتوني.. شكلي كنت حامل ونزلت مرة تانية!
ضليت ساكتة مو قادرة انطق بشي
بيان: بتول وين شردتي
اخدت نفس طويل وطالعتو لبرا وقربت لعندا وقعدت حدها عالسرير.. مشيت ايدي ع شعرها وغمضت عيوني
اطلعت فيني وحست انه في شي..
بتول: اسمعي اختي.. بعرف انه يلي رح خبرك فيه صعب بس مافيني ضل عم فكر واهري وافري وطول عليكي.. انا رح خبرك لانه هالشي ربنا رايده ومافي من المكتوب هروب..
انتي ياروحي هلء مريضة ومحتاجة عملية..
انتي هلء الاهم بحياتنا.. لا بيبي ولا غيره رح يكون اهم من صحتك عم تفهمي
بيان: شو قصدك
بتول: احتي انتي عندك الياف سرطانية بالرحم ولازم يعملو عملية يشيلو الرحم.. لهيك ما بدي اياكي تزعلي.. بترجاكي بدي بس تقولي الحمدلله
والله ياروحي كل شي نصيب
كانت عم تطلع فيني وعيونها ما عم ترمش.. ما لقيتا الا انفجرت بالبكي.. حضنتا وضليت ابكي معها
حسيت بوجعها كتير
حسيت كانه انا يلي عم اتوجع
يلي بقلك انه ما حد بحس بالوجع الا صاحبه بكون كذاب.. لاني حسيته.. حسيته من كل قطعة بقلبي
الجزء الخامس:
تعتب اختي كتير ونفسيتها كانت تصير اسوء كل يوم عن يوم.. بس ما كان بايدها تعمل شي..
يوم موعد العملية فقت من بكير انا وامي ومرة عمي ام سامح ورحنا كلنا لنوقف معها
فاتت العملية وبعد ساعتين طلعت منها.. وبقيت كم ساعة نايمة ونحنا بقينا ننطر فيها لتفيق..
لما فاقت.. كانت انسانة تانية
انسانة مجردة من المشاعر.. من الحب.. من الاحساس
كانت مطفية.. مرهقة.. وعم تتألم
اول سؤال سالتها اياه كيفك هلء!!
واول جواب خبرتني اياه
ما تسألي عن حال انسانة ميتة..
بكيت كتير وانحرق قلبي عليها..
معقول المرأة لما يصيبا هيك شي بكون صعب لهالدرجة..!!
معقول الرحم شي مهم بالنسبة النا بهالكم هاد..!!
اي اكيد.. من شوفتي لاختي اتاكدت انه المرأة ما بتعد حالها مرأة بلاه..
صعب كتير يشيلو جزء من جسمك والاصعب لما يكون هالجزء اهم شي فيك..
..
رجعت اختي ع بيتها ورجعنا نروح لعندها ونطل عليها ونضل نواسيها.. بس ما كان ينفع معها شي
صحيح صحتها تحسنت ورجعت لحياتها وبيتها وزوجها بس ما رجعت بيان الي بعرفها
ابتسامتها صارت مصطنعة
ضحكتها مصطنعة
كل شي فيها كان تمثيل.. كانت عم تتألم من جواها رغم انها ما بتظهر الا الابتسامة..
لغينا حفلة الخطوبة بسبب الي صار معها وطلبت من ايهم يأجل شوي بالفرح لحتى ننسى شوي وتمشي هالايام..
كنت قاعدة انا وامي وايهم كان سهران عنا
امي: ايمتى ناوية تبدي تجهزي تياب ياامي ما ضل كتير لفرحك
بتول: والله مو عارفة ياامي ما الي نفس لشي
امي: وشو بدنا نعمل والله انا متل حالاتك مفكرتيني يعني مبسوطة ولا بالي مرتاح والله قلبي عم يتقطع ع اختك وليل نهار عم صلي وادعي ربي يصبرها ويعوضها خير
ايهم: يارب يامرة عمي بس والله بيان صعبانة عليي انتو ما بتشوفوها.. كل يوم بنزل لعندهم انا وامي بنحاول نغيرلهم جو بس بيان ما عادت متل قبل حتى مع سامح عم تبعد عنه كتير خايف عليها والله
بتول: اخ لا تزودها عليي
امي: الله يصبرك يابنتي
كانت تمر الايام متل بعضها متعبة ومؤلمة ما كنت فرحانة بنوب فرحتي انطفت.. ما كان الي قلب اطلع وجهز واشتري واختي حالتها النفسية هيك
بعد 3 شهور من المواساة والمحاولة باننا نسي ونعوض ع بيان نجحنا شوي بانه نرجعها لحياتها الطبيعية
من ناحيتي انا ومن ناحية زوجها الي ما قصر بنوب وحاول قدر الامكان انه يسعدها وما يحسسها بالنقص ومن ناحية اهلي واهله كلهن..
بيان تقبلت شوي الواقع وبلشتها تتأقلم بس مافيها تنسى النقص يلي صار جواتها..
بديت اطلع وجهز لفرحي..
كنت ميل عليها وانا راجعة من السوق او وانا طالعة مع ايهم
اليوم كنت رايحة انا واياه مشوار ميلت عليهن
بتول: كيفك مرة عمي
ام سامح: بخير حبيبتي تفضلي
بتول: شو عم تعملي لوحدك
ايهم: انا رايح مشوار برجع بعد شوي
بتول: ايه ماشي مع السلامة
ام سامح: الله يسهل عليك ياامي.. ايه يا بتول والله كنت قاعدة عم طرز شوي بمل كتير لحالي
بتول: يلا هانت عن قريب بيجي انا وبونسك
ام سامح: هههه الله يرضى عليكي يابنتي ان شاء الله يارب
بتول: كيفها بيان الي كم يوم ماشفتا
ام سامح: الحمدلله احسن بكتير
بتول: رح اطلع شوي لعندا عن اذنك مرة عمي..
طلعت لعندا وفتحتلي..
بيان: اهلا وسهلا حبيبتي فوتي
بتول: كيفك ياروحي شو عم تعملي
بيان : ولا شي جهزت الاكل وقعدت احضر عالتلفزيون
بتول: ايه وينه سامح مو عندك شو دعوته الي فترة اكتر من مرة اجي لعندك ما الاقيه
بيان: مشغول الله يعطيه العافية
بتول: يارب يااختي ويخليكو لبعض
رجعت من عند اختي عالبيت لانه ايهم طول بمشواره. وتاني نهار طلعنا انا واما من الصبح
كنت عم نلف بالسوق..شرينا كم غرض وبعدا خبرت امي نروح نتفرج ع محلات الذهب..
ونحنا رايحين باتجاه المحل لمحت سامح جوز اختي
وقفت مكاني وما قدرت اتحرك يمين ولا شمال..
امي: لك شو في مالك توقفتي خلصي مشي
بتول: امي!!
امي: لك شو
بتول: مو هاد سامح
امي: وينه
بتول: ليكو يلي لابس ازرق.. ماماا مين هي يلي معه
امي: اي هاد سامح.. لك مين هي
بتول: لك مااسك ايدها.. عم يخون اختي!!! الحقيرر ليكون متزووج ياامي
امي: لك شو عم تحكي انتي مستحيل
بتول: لكان شو هااد اسمو!! انا رايحة لعندهم
الجزء السادس:بقلم ندآء الصوالحي
تركت امي واقفة ع الرصيف التاني وصرت اركض بالشارع بدي لحقهن قبل ما يغيبو عن عيوني
اول ماوصلتهن وقفت وماقدرت احكي ولا كلمة.. شافني سامح وتوتر كتير وصار يتلفت حواليه يمين شمال
سامح: بتول انا
بتول: انت شو..!! مين هي!! مرتك؟؟ خطيبتك؟؟ عشييقتك؟؟ لك مين
سامح: بتول هي بتكون خطيبتي
بتول: شوووو خطيبتك!!! يخرب بييتك.. لك جرح اختي لساا ما طاااب
سامح: اسمعي خليني فهمك لو سمحتي نحنا بالشارع
بتول: شو اسمع.. مافي شي افهمو.. كل شي واضح
قربت امي لعنا لتعرف شو صاير.. قبل ما توصلنا مسكتا من ايدا وحكتلا خلينا نمشي
امي: لك ياامي شو عم تعملي شو يلي عم يصير
سامح: مرة عمي لو سمحتي وقفي لفهمك
بتول: امشي امي امشي ما في شي نفهمه منه حسبي الله ونعم الوكيل
كملنا طريقنا انا وامي مشي وخبرتها يلي حكالي اياه بكيت انا وامي كتير ع حال بيان.. مو متخيلة شو رح يصير فيها لو دريت بالموضوع.. اكيد رح تروح فيها
بيكفي يلي خسرته من قبل ما رح تتجمل كمان تخير زوجا وحبيب عمرا.. ياربي شو هالبلاوي يلي عم تصيبا لهالبنت..
رجعنا عالبيت وقعدت انا وامي وابي وبقينا طول الليل نحكي بالموضوع وامي ما كانت قادرة تخبر بيان بشي حتى ابي.. ما كان بايدي شي غير احكي ل ايهم يلي شفتو بركي بنلاقي حل سوا..
رحت ع غرفتي ومسكت موبايلي لاحكي مع ايهم اتصلت عليه بعد كم رنة رد..
ايهم: مسا الفل حبيبتي.. شو روحتي
بتول: اي حبيبي الي فترة
ايهم: والله وليه ما خبرتيني
بتول: ما كان فيني انشغلت
ايهم: ممم بشو شبكي صوتك مو على بعضه
بتول: اخ شو بدي قلك.. مو مصدقة لهلء يلي صار حاسة راسي رح يتفجر من كتر التفكير
ايهم: لك شبكي قلقتيني
بتول: سامح ياايهم
ايهم: شبه!!!
بتول: ااخ ياربي.. لك اليوم شفته بالسوق.. شفته انا وامي مع وحدة.. طلعت خطيبتو.. خبرني بكل وقاحة وبدو اياني اسمع منه.. لك بدو يتزوج ع بيان
ايهم: اي!!
بتول: شو ايه! شبك ما توقعت ردة فعلك هيك.. مو معقول انت..
ايهم: مو هيك بس انه
بتول: انه شو.. بدك تقلي حقه وحياته.. بعرف هالشي.. بس عالقليلة كان استنى لوقت ما جرحها يطيب وتنسى.. بدو يموتها هاااد
ايهم: بتول انا بعرف بهالشي كنت بدي خبرك بس
بتول: شووووو.. بتعرف.. شو اتكرمت حضرتك!! بتعرف انه سامح خاطب.. لك ليه ما خبرتني.. وبتأيده كمان!! لك حسبي الله فيكن كلكن
ايهم: لك شبكي اهدي خلينا نحكي
بتول: شو احكي.. ماضل حكي.. لك كلكن متل بعض.. ع اول مفترق بتبيعونا.. ع اول عقبة بتواجهنا بتتخلو عنا.. وانت متلك متل سامح مافي شي بيفرقك عنه
ايهم: بتول انتي شو عم تخبصي اعرفي شو عم تحكي
بتول: اي انا بعرف منيح شو عم بحكي سلام
سكرت الموبايل وضربته بالارض وقعدت ابكي.. انقهرت كتير ع بيان وع حالي.. كيف هيك استغلو ضعفها ونقصها وخطبولو وهيا بأمس الحاجة اله..
وايهم يلي مأيده واكيد مساعده بهالشي..
فاتت لعندي امي وانا ببكي وخبرتها كل شي.. قعدت تواسي فيني وتقلي انه زح نلاقي حل وكل شي رح يتصلح..
حاولت فكر بطريقة خبر فيها بيان بس كل ما كنت امسك الموبايل ارجع حطه مكانه.. ما كان بدي احكي معها عالموبايل لانا ما رح تستوعب الشي يلي رح تسمعه.. وبتفس الوقت ما كنت قادرة روح لعندا وخبرها ما كان بدي شوف سامح ولا شوف ايهم..
تاني نهار الظهر كنت قاعدة انا وامي وعم نحكي بالموضوع وابي كان بالشغل.. دق باب البيت قمت فتحت.. كانت بيان.. توترت كتير وما عرفت اطلع بعيونها.. يمكن لاني بعرف شي ومخبياه عنها لهلء
بتول: اهلين اختي تفضلي
بيان: كيفك حبيبتي وينها امي
بتول: ليكها جوا تعي اقعدي لسا ما عملت القهوة
بيان: اي روحي اعمليها
فتت عالمطبخ وبيان راحت لعند امي عالصالون.. وقفت ع الباب واطلعت عليها من بعيد كانت طبيعية وهادية اتاكدت انها ما بتعرف شي لهلء..
ركبت عالقهوة واخدت نفس وقررت استغل جيتها والموقف هاد وخبرها بالموضوع انا وامي سوا..
الجزء السابع: بقلم ندآء الصوالحي
عملت القهوة وفتت لعندهن كانو عم يحكو عن ابي وشغله..
قعدت وبلشنا شرب القهوة.. لما خلصو حكي بالموضوع بقينا نحنا التلاتة ساكتين وعم نطلع ببعض..
كان باين علينا انه كل وحدة في بقلبها حكي مو قادرة تحكيه..
بس انا كنت الاجرأ فيهم.. وكنت دائماً ما ابدأ بالمواضيع وبالمواقف كلها..
حطيت القهوة بالصينية وفتلت حالي ع جهة بيان..
بتول: بيان.. بدي احكيلك شغلة
امي: بتول خلص بلاها خلينا مروقين..
بتول: لا امي.. نحنا مو مروقين.. شوفي كيف متوترين وعم نرتعش..
بيان: وبعدين!!
بتول: شوفي اختي.. والله بعرف الي بدي خبرك فيه صعب كتير.. بس لازم تعرفي هالشي.. انتي تلقيتي الاصعب منه لهيك رح خبرك.. انتي بتعرفيني ما بحب خبي عليكي شي
بيان: ايه اختي احكي مو فارقة
بتول: اختي امبارح كنا انا وامك بالسوق.. و شفنا سامح جوزك هنيك
امي: خلص امي بلاها
بيان: لا اختي كملي شو فيه
بتول: شفناه مع وحدة وخبرنا انها خطيبته.. جوزك بدو يتزوج يا بيان
بيان: ايه اختي بعرف..
حسيت حالي ما سمعت منيح.. قربت لعندها ورفعت راسها واطلع بعيوني
بتول: شو عم تحكي
بيان: عم قلك بعرف
امي: من ايمتى يا بنتي..
بيان: انا يلي طلبت منه يتزوج.. وانا يلي اصريت على هالشي
بتول: شوو انتي من كل عقلك بتقولي
امي: استغفر الله العظيم من كل ذنب عظيم
بيان: امي.. بتول.. انا كنت رح خبركن.. بس ما كان الوقت مناسب.. كل شي صار بسرعة وبهدوء.. سامح كان رافض الفكرة تماما بس انا ما كان عندي حل تاني
بتول: كيف ما كان عندك حل تاني.. انتي كيف بتعملي هيك.. ليش لتخليه يتزووج
بيان: لانه حقققه.. حقه يتزوج من مرة طبيعية مو ناقصها شي حقه يجيب ولاد ويسمع كلمة بابا.. مو مجبور يعيش العمر كله محروم بسببي.. اناا بحبه لسامح وما بسمح لحالي كون انانية واتركو يتعذب معي
امي: بس يا بنتي
بيان: بترجاكن افهموني..هاد قراري انا مرتاحة لانه اخدته.. سامح ما كان قبلان ابدا.. وقعدت اكتر من شهر اقنع فيه كل يوم حتى مرة عمي وايهم كلهن كانو رافضين الفكرة بس انا كان لازم اقنعهم واعمل هيك.. انا بكون سعيدة لما بشوف سامح سعيد.. رح كون سعيدة اكتر لو شفته حامل ولاده وصار اب عم تفهموني
بتول: والله مو مصدقة يااختي مو عارفة شو بدي احكيلك.. ليش هيك عملتي.. انتي مو ناقصك شي والخلفة مو كل شي بهالحياة كان فيكي تعيشي انتي وسامح حياة حلوة وهادية ليه عملتي بحالك هيك
بيان: لانه اول عن اخر كان رح يتزوج.. لو بعد سنين كان رح يحن للولاد ويتزوج.. لهيك اختصرت الطريق واختصرت عذاب التفكير وعذاب اني اعيش بذنبه
امي: الي بيريحك يابنتي نحنا بس بدنا نشوفك مرتاحة ومبسوطة واذا هالشي بيناسبك ف انتي حرة.. بس لازم تعوفي انه بيت ابوكي مفتوح الك طول العمر انتي واختك ياامي..
بيان: الله يخليلي اياكن يارب ما تقلقو عليي انا منيحة..
ما قدرت جاوبها ولا ناقشها بالموضوع.. كانت عم تحكي ومتقنعة بكل حرف عم تقوله.. ومافي شي بيقدر يأثر عليها ولا على تصرفاتها..
بيان كانت مثقفة وواعية وراكزة.. بس ما الها نصيب بهالحياة..
صعبانة عليي كتير.. وصعبانة عليي نفسي وخايفة واجه الي هيي واجهته.. خايفة ما اقدر اصبر واتحمل متل ما هيا صبرت..
خايفة يصير فيني متلها.. ما رح اتحمل عيش بهالحالة ولا رح اتحمل شوف جوزي مع وحدة تانية..
قعدت معنا بيان ساعة خبرتنا عن الي صار كله وكيف هالشي كان برضاها وطلبها.. وخبرتنا نحكي لابي ونطمنه.. ورجعت ع بيتها..
فتحت موبايلي لقيت رسائل من ايهم عم يشرحلي فيهن خطوبة سامح وانه هاد طلب بيان وانه هوا ما حب يخبرني لانه عارف رح ازعل واعمل قصة..
ارتحت من فكرة انه ايهم ما اله يد بزواج سامح.. بس بقيت متدايقة لانه خبى عليي هالشي وما اتصلت ولا حاكيته
والموضوع ما كان بس ع قد اني متدايقة
كنت خايفة.. خايفة كتير
خايفة من فكرة الزواج.. الخلفة.. الزوج والارتباط وكل شي
مر تلات ايام ما حكيت فيهن مع ايهم وهالشي كان اول مرة.. لانه ما كان يمر ساعة ما نحكي فيها سوا
اشتقتلو كتير ونفسي شوفه واسمع صوته بس مو قادرة..
الجزء الثامن:
اتصلت فيني اختي بالنهار ع تلفون البيت وانا عم ساعد امي بالمطبخ..
بيان: شو ياروحي لايمتى رح تضلي هيك زعلانة من ايهم
بتول: عادي مو زعلانة
بيان: كيف مو زعلانة لكان ليه مسكرة موبايلك وماعم تحكي معه.. والله انه متدايق كتير وكل شوي بييجي يسالني عنك.. اختي ما تظلميه ايهم ما دخلو بشي انا يلي خبرته مايحكيلك شي وخليته يوعدني ما يخبرك
بتول: خلص هلء بحاكيه والله انا حتى اشتقتله مابعرف شلون هيك قدرت ابعد عنه
بيان: الله يخليكو لبعض ياروحي
سكرت مع بيان عالتلفون الارضي ورحت ع غرفتي فتحت موبايلي وع طول وصلوني رسائل فتحتن كانو اكتر من 80 رسالة ما قدرت اقرأهن اتصلت ع ايهم واناا ملهوفة لاسمع صوته
ايهم: بتوول ياروحي هيك بتعملي فيني كييفك وين انتي لييه مسكرة موبايلك هلء هيك صار الحكي بينا
بتول: ياروحي شو اشتقتلك ما تزعل مني والله كنت مخنوقة من يلي صار سامحني ايه
ايهم: لا مو مسامحك هيك بتتركيني كل هالايام حتى ما فكرتي تطمني عليي
بتول: بعرف اني ظلمتك بس ما كان بايدي ما تزعل مني رح عوضك تعا لعندي اليوم خليني شوفك..
اتصالحت انا وايهم ورجعنا نحكي ونتواصل متل قبل واحسن.. بيان ما عم تجيب سيرة جواز سامح بنوب وعم تتركو ع راحتو.. كلنا بطلنا نتدخل ولا نسالها عن الموضوع لانها كانت رافضة نتدخل او نعطيها رأينا بشي..
بعد شهر ونص قرب زواجي كتير كان باقيلو اسبوعين..
كنت قاعدة عم احكي مع ايهم اتصلت فيني بيان اكتر من مرة وكنت اعمللها انتظار..
بتول: ايهم ثواني وبرجعلك رح شوف بيان شو بدا الا ساعة عم تتصل.. ما بطول ايه.. بحبك
ايهم: ماشي ياقلبي لا تتاخري..
فتحت الخط ع بيان كانت عم تبكي او تضحك ما عرفت ميز شبها..
بتول: بياان شو فيه
بيان: هههه ااخ بتوول
بتول: لك عم تبكي.. لا لا عم تضحكي شو في صايرلك شي
بيان: سامح
بتول: شبه
بيان: اجا لعندي هلء عم يعصب ويكسر بالبيت.. فسخ خطوبته منها.. مابدو يتزوج.. بهدلني واتخانق معي وخبرني ما اتدخل في حياته.. خبرني انه ما بدو ولاد وهوي هيك مبسوط.. خبرني انه ما اجبره ع شي.. خبرني انه ما رح يقدر يعيش مع حدا غيري.. شايفة يا بتول مو مصدقة يلي صار
بتول: ههههههه يارووحي انا.. لك خلص ما تبكي
ليش زعلانة ياروحي.. افرحي اضحكي.. شايفة كيف.. نلتي عملك الصالح ياروحي.. ربنا ما بيظلم حدن بهالدنيا.. ربي يهنيكي ويخليكن لبعض.. خلص ياروحي لا بقى تجيبي سيرة الجواز لسامح مرة تانية عم تفهمي انتي عملتي الي عليكي ايه
بيان: ماشي ماشي يااختي..
سكرت مع بيان وركضت خبر امي وابي يلي ارتاحو وانبسطو كتير لاختي.. وخبرت ايهم يلي فرح كتير ونزل لعندهم ليشوفها..
اختي اتحسنت كتير من بعد يلي صار.. الي عمله سامح كان شي كبير بالنسبة الها.. قدر يقلب حياتها من جحيم لجنة مرة تانية.. احتواها واحتضنها وما اتخلا عنها رغم كل شي..
انا فرحت كتير وعم استنى باليوم يلي اتزوج فيه وكون قريبة من اختي ومن ايهم حبيبي..
يوم فرحي كان حلو كتير وبسيط.. كنت متل الملكة.. كنا انا وايهم متل عصافير الحب نضحك شوي نتناقر شوي ونتدلع شوي.. كنا لابقين لبعض كتير والكل فرحلنا وباركلنا..
اتزوجت واستقريت وعايشة احلى قصة حب مع ايهم..
هلء ساكنة مع مرة عمي بالبيت انا وهيا وايهم..
عم انزل كل يوم لعند اختي واحيانا هيا بتيجي لعنا بتقضي النهار كله لما يكونو زواجنا بالشغل..
بعد 3 شهور من زواجي.. عرفت اني حامل
ما قدرت شارك فرحتي مع حد خفت كتير ع مشاعر بيان.. بس ايهم شجعني خبرها وما حسسها بشي.. وفعلا خبرتها وكانت رح تطير من فرحتها.. يمكن لانها انحرمت من هالشي كانت عم تستنى اني احبل على نار.. كانت بدا تطمن عليي.. طول حملي عم تهتم فيني وتخاف عليي هيا واهلي وبيت عمي كلهن..
كنت بشهري وقاعدة عم احضر فيلم انا وايهم وحاطة صحن الفوشاز ع بطني يلي واصل لحلقي.. لما حسيت بوجع طلق
قمت عن الكنب ورميت الصحن من حضني طار الفوشار بكل مكان..
ايهم: لك شو فيه
بتول: اوف اوف الحقني الحقني رح اولد
ايهم: شو هييك هلء الدنياا نص ليل
بتول: شوو اعملك لك الحقني خلصني شيلني
ايهم: شو اشيل فيكي رح تموتيني هههه استني استني خدي نفس اوف اوف خدي نفس يلا يلا
بتول: لا اسكوت بدك تولدني هون فيق مرة عمي بسررعة اووولي..
الجزء التاسع والاخير ؛ بقلم ندآء الصوالحي
رحت انا وايهم ومرة عمي واتصلنا ع امي وابي ولحقونا عالمشفى بعد 3 ساعات من المعاناة والوجع.. ربنا سهلها عليي واكرمني ببنوتة متل القمر
اول ماشفتا وحملتا بين ايدي حسيت حالي عم شوف بيان
كانت نسخة من خالتها.. عيونها.. انفها.. دقنا الصغنون وخدودا البارزين
ايهم: الحمدلله ع سلامتك ياروحي شايفة بنوتتنا شو قمر
بتول: هي بيان..
ايهم: شو
بتول: رح سميها بيان..
سلجنا اوراقنا وخلصنا كل شي وسميت بنتي بيان ع اسم اختي.. ورجعنا عالبيت لما طلع النهار
اول ما وصلت ما قدرت فوت ع بيتي هيك بدون ما شوف اختي..
ايهم: لوين
بتول: بدي اطلع شوف بيان
ام سامح: يابنتي هلء هيي بتيجي لعندك ما بتقدري تطلعي رح تهلكي لساتك تعبانة
بتول: خلص انا حابة اطلع.. ايهم اعطيني البنت..
طلعت عالدرج وايهم ساندني دقيت الباب فتحلي سامح اول ماشافني سلم عليي واخد البنت وقعد يبوس فيها..
سامح: لسا كنا رح نيجي نطمن عليكي متى روحتي.. الف الحمدلله ع سلامتك.. مبروك اخي ما اجاك
بتول..ايهم: الله يبارك فيك يارب
اخدتها منه وفتت ع بيان عالغرفة كانت عم تلبس وبدا تيجي لعندي
بيان: بتوول.. شو جابك لهون ياروحي كنت جاية لعندك.. الف الحمدلله ع سلامتك
قربت لعندا وحطيت البنت بحضنها.. مسكتها وقعدت عالتخت وبلشت تتأمل فيها وعيونها تتعبى بالدموع
بيان: ياروحي بسم الله ما شاء الله.. ربي يحميها ويباركلنا فيها
بتول: هي بيان
بيان: شو
بتول: سميتا بيان
بيان: عم تحكي جد
بتول: ايه عم احكي جد.. لانها ما رح تكون الا متلك.. صتدقة بالمشاعر وبالاحاسيس.. نادرة الوجود.. حنونة.. ومافي منها
اطلعت فيني واجت حضتني وصارت تبكي..
#بعد 4 سنوات
بتول: لك شايف ولادك.. اي ما انا مو امهم اناا حيطة بهالبيت
ايهم: اي بتستاهلي خليكي زعليهن.. الله يخليلهن خالتهن
بتول: هلء هيك يعني.. انا رايحة شدهن من شعورهن الهن 3 ايام نايمين فوق عند بيان وسامح
ام سامح: ههههه
طلعت عالدرج ركض وانا عم نادي ع بنتي بيان وابني كرم
بتول: بياااان كرررم لك والله لكسرلكن عضامكن
فتت ع بيت اختي وانا عم الهت
بيان: لك شو هالمنظر هاد شو بدك
بتول: وينهن الزعران
بيان: عم يحضرو عالتلفزيون
بتول: ايه وليه انتي واياه تعو لهون
كرم: ثو ماما
بتول: لك الك من ايمتى ما نزلت لتحت ايه
بنتي بيان: ما بدنا ننزل بدنا نضل هون عند خالتو بيان انتي خليكي لوحدك عند تيتا ثح كرم
كرم: اي ثح
بيان: هههههههه يقبروني حبايب خالتو.. خلص اختي انقلعي وسكري الباب وراكي
بتول: اي ماشي خليكن هون ما في الكن نزلة لتحت بنوب
كرم: ماثي هي
بتول: لك شف الفصعون.. اختي قومي قومي اعملي فنجانين قهوة رح طق واشربها
بيان: هههه من عيوني.. تعي الحقيني عالمطبخ رح خبرك هالخبرية..
بتول: شوو

#إنتهت
….
ماحد يقلي شو بيان بدها تخبر بتول 😂😜

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق