روايات وقصص

رواية قلبي مزدوج

رواية قلبي مزدوج بقلم نداء

الجزء الأول:
صعب تكون مختلط المشاعر.. عم تتحير بكل شي بتحسه حب ولا مو حب..
بعشقو ولا بحبه متل اخي..
بحب امي اكتر ولا هيي..
ازدواج المشاعر يلي بقلبي عم تعمل اعصار وما عدت قادرة أتحكم فيه
..
كنت قاعدة عندهن متل كل يوم ما بقدر يمر يوم بلا ما شوفها .. قاعدة ع الارض وضامة رجليا لصدري ومقربا من راسا وعم اطلع فيها وفكر
..
هي عمتي.. الي في شي جواتي بيربطني فيها.. بحبا كتير وبحب ضلي حدها وإهتم فيها
هي إمي التانية.. او امي الاولى مابعرف أوصفلكن شعوري إتجاها
بس كل يلي بعرفو اني بحبا اكتر من امي
شو حلوة ملامحها الناعمة والحزينة
كنت عم بتأمل فيها لما فاقت وشافتني فوق راسا
ام معين: رغد انتي هون بنتي
متى اجيتي؟!
رغد: اي الي ساعة عمتي بس انتي غرقانة بأحلامك هههه
ام معين: ليه ما فيقتيني قاعدة لوحدك
رغد: مو مهم ليكني قاعدة ما مليت ما تخافي
ام معين: ما اجو الولاد
رغد: لا ما حد اجا
كيف انتي هلء ان شاء الله احسن
ام معين: اي منيحة ياروحي بكفي شوفتك كل يوم عم تردلي الروح
رغد: هههه اي لكان بدك تشوفي قمر متلي وماتردلك روحك
ام معين: هههههه
قطع حديثنا قيس لما فات
قيس: بس ماتشوفي حالك كتير هههه
قيس شب وسيم طويل وحنطي البشرة وشعراتو سود ناعمين وعيونو متل لون شعره بس فيهن لمعة كلها حنان وحب.. نظرته لوحدا بتخليني انسى كل الاعاصير يلي بتدور جوات قلبي
ام معين: انت جيت ابني
يعطيك العافية
قيس: الله يعافيكي امي.. كيفك رغود
رغد: منيحة بشوفتك
..
قيس هاد ابن عمتي الاصغر.. هاد بيكون حب الطفولة وحب الكبر وكل شي اسمه حب
معين اخوه الكبير يلي بعتبرو الاخ والصديق الي ما بخبي عنه شي
..
قيس: شو رغود بشوف خالي سمحلك تيجي ولا اتخانقتو متل كل يوم
رغد: لا ما سمحلي كل يوم بخبرهن اني رايحة لعند عمتي بيقوم يطاوش فيني ما بعرف ليه
شو صاير عمتي بينك وبينه؟؟
ام معين: والله ياروحي مو صاير شي بتذكر من وقت ما توفت بنتي اسماء من 11 سنة قطعني وماعاد اجا لعندي غير بالمناسبات السعيدة الله يسامحه ابوكي كنا انا واياه روحين ببعض
رغد: بتشتاقيلها لاسماء ياعمتي بعد كل هالسنين
دمعو عيونا ونطقت بصوت عم يرجف
ام معين: وانا بنساها ياعمتو هي كانت بنتي الوحيدة قطعة من قلبي راحت بغمضة عين بتذكر لما كنتي انتي واياها تلعبو هون بهي الغرفة كنتي كل يوم تيجي لعندا
قيس: خلص امي ماتبكي
رغد: خلص عمتي والله مو قصدي ذكرك
ام معين: خلص مافيني شي بدي نام شوي اتركوني ارتاح اي
قيس: براحتك امي تعي رغد نطلع لبرا
..
طلعت انا وقيس ووقفنا ع باب البيت
رغد: معقول ما رح ييجي يوم وتمشي ع رجليها
قيس: ما في شي كبير ع الله.. بس هيي الها من وقت ماتوفت اسماء ما عاد مشيت يعني الها سنين كتير ما بعرف يارغد مابعرف
المهم مابدك تروحي عالجامعة اليوم
رغد: ما عندي دوام
اطلع قيس فيني من فوق لتحت
انا صبية ناعمة كتير ووجهي طفولي متل ماعم يقولو بشرتي بيضا وخدودي موردين .. عيوني واسعين ..
كان عم يتأمل فيني لحد ما انتبه على لبسي يلي ماعجبو
قيس: صحيح ليه لابسة هااد القميص انا كم مرة خبرتك ماتلبسيه
رغد: لك شو به طويل وبعدين انا بحبه عليي
قيس: اي هي اخر مرة بخبرك لا تلبسيه والله اذا شفتك فيه بعد هلء ما رح يصير خير
رغد: ههههه بتغار
قيس: لا ليش لغار
اطلعت فيه نظرة غضب ولفيت وشي وكنت بدي روح وكلمتو بجكر
رغد: اي لكان رح روح فيه بكرة عالجامعة يلا بااي
قيس: لك تعييي والله بقتلك لو رحتي فيه
رغد: ههههه ليه
قيس: لاني بغاار بغار كتير مبسوطة
رغد: هههه اي مبسوطة
قيس: ههههه ماشي لكان يلا روحي عالبيت هلء امك بتقلق
رغد: اي انا رايحة بشووفك
..
مشيت من عند بين عمتي شوي لحد ما وصلت بيتا لانهن بنفس الشارع قراب من بعض كتير بتفصل بينا بس شوية بيوت
..
انا رغد عمري 19 سنة اول سنة الي بالجامعة عم ادرس طب برغبة من ابي انا وحيدة اهلي.. ابي دكتور جراحة وامي ست اكابرية بالبيت دائماً معززة مكرمة وضيوفا ما بيخلصو
احنا وبيت عمتي ما النا غير بعض لإنو مغتربين ومافي النا قرايب كتير هون بروح لعند عمتي كل يوم تقريباً لانه زوجا متوفي من سنين وماعندا غير شابين قيس ومعين وعطول بالشغل..كان عندا بنت قدي بالعمر اسماء بس توفت وهيي عمرا 8 سنين بحادث سير ع باب البيت وهالشي صدم عمتي والزعل الشديد الي مرت فيه صابها بشلل وماعادت تقدر تمشي
..
وصلت ع باب البيت وقفت واخدت نفس طويل..
رغد: يا ربي انا شو بحبا لعمتي وامي وابي بحبواا بس في شي غريب بين ابي وعمتي ما عم اقدر اعرفو ابي عم يتهرب منا كتير وما بيروح لعندا رغم المسافة القصيرة يلي بينا وكل ما بدي اروح لعندا بيعملي مشاكل وبالعافية لما بيقبل يخليني روح.. حجن واعرف شو السبب
الجزء الثاني:/بقلم نداء الصوالحي
فتت لجوات البيت كانت امي قاعدة عم تتفرج ع شاشة التلفزيون بالصالون.. التفت عالباب وانتبهت اني وصلت
وصال: انتي جيتي ماما وينك لهلء
رغد: كنت عند عمتي
وينو ابي
وصال: ليكو جوا بمكتبو هلء اجا من الشغل وسأل عنك
رغد: اي انا فايتة شوفو
..
وصلت لمكتب أبي ودقيت ع الباب وفتحتو ومديت راسي لجوا بخفة
رغد: فيني فوت يامشغول
نضال: ايه بابا تعي فوتي
نضال ابي كان قاعد ع المكتب وعم يدخن
كان رجال كبير بالعمر بس مهتم بصحته وبشكله متوسط الطول ووسيم الوجه وشعرو ممزوج بين الشيب والاسود بس كان غامض كتير ما بنعرف عن شغله او علاقاته الخارجية ايا شي
قربت لعنده وطبعت بوسة حنان على راسه
رغد: موااه كيفك
نضال: تمام يابنتي انتي كيفك
رحتي اليوم ع المراجعة تبعتك
رغد: لا بابا مارحت.. خلص بابا حاج تقلق مابني شي شووف ليكني متل الفل
نضال: انا كم مرة خبرتك ما تنطشي المراجعة يلا قومي إلبسي رح نروح هلء نراجعلك
رغد: يا الله يا بابا والله مو محتاجة مراجعة الي 10 سنين عاملة هالعملية وراجعت كتيير ودايما عم يطمنووك خلص مافي داعي ضل راجع
نضال: بس يابنتي
رغد: بعرف انك بتقلق عليي بس لو اتعبت او حسيت بشي رح خبرك ليكو قلبي متل الحديد ومافيني شي
نضال: ايه متل مابدك
رغد: بس بتعرف يا بابا بحس احساس غريب كانه في شي جواتي ما عم اقدر فسرو
نضال: ايه عادي بابا
المهم كنتي عند عمتك اليوم مو؟!
رغد: اي رحت لعندا بابا بس ما تحاول معي بقصة عمتي مافيني يوم ماشوفها بلا ما نتخانق كل مرة ع هالموضوع
انت لييه بتكرهها لعمتي
نضال: ما بكرهها هي اختي مستحيل اكرهها ليكني عم ابعتلا دايماً مصاري وعم ابعتلا شغالة تنضف وتطبخ وتعمللهن كل شي وشغلت ولادا التنين كمان وبتقولي بكرهها.. بس ما بدي تلتهي عن دراستك
رغد: بس انت ما عم تزورها ابداً وليكها هوون قريبة.. ومابتحب تخليني روح لعنداا هيك بحس انك ما بتحبا
مسك السيجارة وطفاها ب توتر وبايدين عم يرجفو
نضال: لا بحبا بس مشاغل مشاغل مو اكتر
قطع حديثنا امي لما فاتت ..
وصال: شو انتو لهلء عم تحكو يلا تعو خلونا نتغدى
نضال: اي ليكنا جايين يلا بابا
في بيت قيس..
كنت قاعد وعم فكر برغد يلي كانت مسيطرة ع كل كياني.. بحبا بشكل كبير ما بقدر العقل يستوعبه
كانت امي متمددة ع سريرا كالعادة ولافة وشا للحيط
قربت لحدا وحاولت شوفا نايمة ولا فايقة وهمست بصوت هادئ
قيس: امي فاايقة؟؟
ام معين: اي فايقة ياروحي في شي
قيس: بدي احكي معك بموضوع
ام معين: اي احكي امي شو فيه
فات معين اخي الكبير ونحنا عم نحكي
معين: السلام عليكم كيفكو
ام معين: اهلين امي يعطيك العافية
معين: شو عم تتهامسو
قيس: اي اقعد اجيت بوقتك بدي احكيلكن شي
ام معين: اي امي احكي
قيس: انا بدي روح اطلب ايد رغد من خالي
معين: اي ياعيني فرطت معه ماعاد يصبر هههه
ام معين: بس ياامي خلينا نجوز اخوك قبلك
معين: لااا امي انا موو مفكر هلء عادي خلينا نفرح فيه ما تنطروني
قيس: يعني ماعندك مشكلة اتزوج قبلك اخي
معين: لااا اخي ما عندي مشكلة بعدين وين بدك تلاقي متل رغد خلينا نخطبك اياها قبل ما تروح منك هههه
ام معين: اي والله رغد بنتي يلي ما ولدتا الله يحميها مافيني يمر يوم بلا ما شوفها
بتحبا ياامي؟!
معين: اي ياامي شو هالسؤال احرجتيه ههههههه
قيس: هههه لك لا
بحبا وبس.. والله ما بقدر عيش بلاها ونفسي اتزوجا اليوم قبل بكرا
بدي نروح نطلبا من خالي بكرة بس مابعرف كيف انتو الكو فترة كبيرة ما عم تحكو مع بعض
بدك تروحي معنا امي؟؟
ام معين: اي بدي روح شوفه لازم واجهه
الجزء الثالث:
في بيت رغد..
تاني نهار فقت بكير وجهزت حالي لروح عالجامعة لاني كان عندي دوام بس لازم ميل ع عمتي قبل ماروح
لبست جاكيت طويل اوف وايت وجزمة بني وحطيت شال ع رقبتي ونزلت لتحت ودعت امي وطلعت
وصلت لعند بيت عمتي ودقيت الباب
فتحلي قيس وهوا عم يبتسم ابتسامة كلا حب واعجاب
قيس: يسعد هالصباح الحلو
اي شو هالشياكة
خجلت كتير ونزلت راسي
رغد: وصباحك يارب.. وينا عمتي
قيس: ليكا جوا فوتي
فتت لجوا وقبل ما اوصل لعمتي سحبني قيس من ايدي ووقفني
اتوترت وسحبت ايدي من ايده بسرعة
رغد: لك شو في
قيس: ليه خجلتي ههه بدي خبرك شي
رغد: شو
قيس: اليوم جاي انا وامي ومعين لعندكن
رغد: عم تحكي جد.. عمتي رح تيجي لعنا عالبيت
قيس: ايه.. بس ما سالتيني شو السبب
رغد: اي اي شوو
قرب لعندي ومسك ايدي التنين واطلع بعيوني
قيس: حتى اتقدملك وتصيري خطيبتي وبعدا مرتي
رغد:..
قيس: لك النا سنين عم نحب بعض من بعيد لبعيد مليت هههه صار لازم نتزوج
رغد:..
قيس: لك شو احكي شي شبك ساكتة ليكون مابدك اياني
رغد: هههه لا شو مابدي اكيد بدي بس مابعرف قلبي انقبض فجأة مابعرف ليه
قيس: لانك متوترة ما تخافي كل شي رح يكون تمام اي
رغد: ان شاء الله
قيس: من بكرة رح تصيري حلالي
انا بحبك
رغد: وانا بحبك
..
فتت اطمنت على عمتي وبعدا رحت عالجامعة
اليوم كان طوييل كتير ومرق بصعوبة وانا عم استنى ارجع عالبيت حتى خبر امي بجيتهن
بعد الروام رجعت عالبيت بسرعة بدون حتى ما ميل عند عمتي..
اول ما وصلت البيت كانت امي وابي قاعدين عم يحكو
وبس شافوني سكتو
رغد: مرحباا
وصال: اهلين امي تعي ياروحي كيف يومك
رغد: منيح ماشي حالوو
كيفك بابا
اطلع فيني ومارد عليي سحب حالو وراع ع المكتب..
اطلعت بإمي وانا مصدومة من تصرفه الي عمرو ما عملو معي قبل هيك
رغد: شو به ابي؟!
وصال: من وقت ما اتصل فيه معين وهوي مو على بعضه
رغد: اتصل وخبره معين؟!
وصال: يعني انتي معك خبر بجيتهن ليطلبوكي؟!
رغد: اه؟! اي خبرني قيس اليوم
وصال: اها يعني حكي ابوكي مزبوط.. كان في علاقة بينك وبين قيس موو
رغد: علاقة شو امي لاا بس هوي معجب فيني وطلب يتقدملي اساساً انا لما روح لعند عمتي ما بشوفه بيكون بشغله
انا رايحة شوف ابي
طلعت لعند مكتب ابي وانا متوترة وعلى اعصابي وخايفة من ردة فعلو
دقيت عالباب وفتت لعنده.. كان عم يحكي بالموبايل
نضال: اه شو به مريض؟! عم تحكي جد.. شو عم يموت؟ لك خلص منيح يلي خبرتني انا رح طل عليه هاليومين
ضليت واقفة حتى يخلص مكالمتو
واول ماشافني قفل الخط
نضال: اي رغد شو فيه
رغد: بابا انا بس كنت حابة وضحلك انه ما في بيني وبين قيس ابن عمتي شي.. هوا طلب يتقدملي وخبرني رح ييجي مع عمتي لهيك مابدي اياك تزعل مني بشي..
نضال: رغد بس جاوبي بصراحة كان في علاقة بينك وبين قيس من قبل
رغد: لا بابا ما في شي بينا .. انت بتعرفني مجرد اعجاب من طرفه
نضال: اي انا بعرف انو بنتي ما بتكذب بس كنت حابب اطمن
بعدين انا خبرتهن انه مرحب فيهن هادي بتضل عمتك.. كنتي مفكرتيني رح عصب لانه عمتك رح تيجي لعنا؟
بعدين قيس ما في منه والقريب احسن من الغريب يعني ما تخافي
رغد: عم تحكي جد بابا.. انت ماعندك اعتراض على قيس
نضال: لا قيس شب محترم ومتعلم وشغيل مابعيبو شي
رغد: يخليلي اياك يا بابا والله انت ما في منك.. بس ليه هيك متدايق شو فيه
نضال: ما في شي بابا تعبان شوي
رغد: الله يخليلي اياك خلص ارتاح بابا
نضال: الله يرضى عليكي..
،
ارتاح قلبي كتير لما خبرني ابي بموافقته طلعت ع غرفتي وضليت جرب تياب وشوف شو احلى شي حتى البسه بكرة..
..
الجزء الرابع:
تاني نهار المسا جهزت حالي ولبست فستان اسود ناعم معرق بورود حمرا.. وفتلت شعري وحطيت ميك اب خفيف.. كنت مبسوطة كتير
ما عم اعرف اقعد بمكان
شوي بروح لعند امي شوفا جهزت ولا لا
شوي بروح عالمطبخ لشوفهن جهزو الضيافة
شوي برجع بطلع بحالي عالمرايي
كنت ضل امسك الموبايل واطلع بالساعة
ملهوفة كتير لنرتبط انا وقيس
بحبه كتير متعلقة فيه كتير.. بتمنى نضل العمر كله سوا
ويمكن لما نرتبط نقدر نحل هالعقدة يلي بين ابي وعمتي يمكن نرجع نلمهن سوا ونقربهن من بعض..
في بيت قيس..
واخيراً بدي روح إتقدم ل رغد
كنت قاعد عم البس القميص الأزرق والغرافة الكحلي يلي اخدتهن من معين
فات لعندي معين واطلع فيني من فوق لتحت
معين: ايييي شو هالحلاوة لك طالعين عليك أحلى من عليي
قيس: اي القالب غالب اخي هههه
معين: مااغلظك
قيس: هههه جهزت امي
معين: اي جهزت هلء ساعدتها باللبس وانا ليكني جاهز وعم نستنى فيك تخلص الك ساعتين عم تجهز حالك
قيس: اي مو عريس خليني اتدلل.. لك ارتحت كتير لما خالي رحب فينا وحسيت بموافقته وانت عم تحكي معه بالموبايل
معين: اي والله وانا كمان فرحت كتير.. الله يهنيك يااخي ويسعدكن
..
رن موبايلي وانا عم البس
حاولت اتجاهل بس رن كتير وما كان عم يوقف
قيس: امسك هاد خليني رد عالموبايل
معين: لك اطفيه مو وقته
قيس: لا بدي رد شكله حد مهم
مسكت الموبايل ورديت عالمكالمة يلي كانت من رقم غريب
قيس: الو
مجهول: معي استاذ قيس
قيس: اي اتفضل مين معي
مجهول: انا ابن دكتور توفيق.. ابي مريض كتير وعم ينازع وبدو يشوفك ضروري عم يقول في شي لازم يخبرك اياه. ياريت لو بتتفضل لعنده
قيس: بس انا مابعرفه لابوك
مجهول: اي بس هوا خبرني انه بيعرفك وطلب مني خبرك انه الموضوع بيتعلق باختك الي توفت من سنين
قيس: اختي؟!! كيف يعني بيتعلق فيها؟!
مجهول: ابي ما خبرني شي تعال قابله وافهم منه.. ياريت ما تتأخر اذا بتحب تيجي انا رح اعطيك العنوان
قيس: اي ياريت خبرني شو العنوان.!
ايه شكرا..
سكرت الخط مع الشب وحطيت الموبايل عالطاولة يلي قدامي وسندت ايديي عليها
حسيت الدنيا عم تدور فيني..
دكتور.. واختي الي توفت وموضوع ضروري.. شو الي عم يصير شو بده يخبرني
معين: لك شو بك شو فيه
قيس: معين انا لازم روح
معين: تروح لوين
قيس: في مشوار بدي روح هلء ضروري
معين: لك مجنون انت عنا موعد مع خالك هلء مابدنا نتأخر
قيس: عم قلك لازم رووح
*الجزء الخامس:/بقلم نداءالصوالحي
في بيت رغد..
كنت قاعدة عم بنطر قيس وعمتي ومعين إتأخرو كتير..
إمي ملت وأبي بدا يتسآئل.. وانا قلقت كتير
شو يلي أخرهن هيك
قيس كان ملهوف لييجي اليوم
شو الي أخرو
وانا سرحانة وعم فكر رن موبايل بابا ورد عليه
نضال: الو اي معين..
معين: انا اسفة كتير خالي ما رح نقدر نييجي اليوم امي تعبت شوي
ما تواخذنا.. رح نيجي يوم تاني ايه
نضال: اي سلامتها.. براحتكن خالي
سلام
كنت عم اطلع بأبي وهوا عم يحكي وسكر الموبايل وصفن
رغد: بابا شو في.. شو خبرك معين
نضال: اعتذرو ما رح يقدرو ييجي اليوم
انا رايح نام تصبحو ع خير
اعتذرو.. شو اعتذرو شي يلي صار
رغد: امي بدي روح شوي عند عمتي
وصال: الوقت متأخر ما فيكي تروحي هلء خلص أجليها لبكرة.. بعدين اكيد في سبب ما قدرو ييجو ميشانه مافيها شي امي
طلعت ع غرفتي وانا حاسة في شي صار.. ماني مرتاحة قلبي عم يقلي في شي مو منيح..
اتمددت عالسرير وحاولت ما فكر ونام
..،
قيس…
كنت ماشي بالطريق راجع من عند الرجال يلي قابلته
كنت دايخ وعم اعرق بشكل كبير
عم امشي بتمايل واطلع بالملف يلي بايدي
الملف يلي اعطاني اياه
مو عارف لوين اروح
ياريتني ما رحت لعنده
ياريتني ضليت على جهلي وعمايي ولا عرفت شي
حسيت قلبي بدو يطلع من محلو
مصدووم وتعبان ومو عارف شو اعمل
شو سااوي ياربي
بس لازم اخد حقنا باي طريقة
رح اخد حق اختي
حق امي يلي انرمت هيك بسببهن
ما رح سامحهن
ماا رح سامح حدا
..
فتت البيت كانت امي ومعين قاعدين وعم يستنو فيني
اول ما شافني معين ركض لعندي
معين: لك شوو في ليه هيك شكلك.. ليه اتاخرت.. خليتنا نعتذر من خالي
ام معين: لك شو بك ياابني انطق احكي شي وين رحت شو يلي صار معك
ماكان فيني احكيلهن شي ما بقدر.. شو بدي خبرهن.. لو امي عرفت الحقيقة ممكن تموت بأرضا مافيني خبرها
قيس: مافي شي ياامي بس صديق غالي عليي كان عم يموت وماقدرت ما روح وشوفه.. توفى الله يرحمه
معين: اي اخي خلص روق الله يرحمه
قيس: حكا خالي شي
ام معين: ما حكا شي خبرناهن بنيجي يوم تاني
قيس: لا خلينا نروح هلء
معين: هلء؟؟.. الوقت متاخر كتير اخي
قيس: لا مو مهم بدي روح هلء قومو خلينا نروح يلا
كنت مستعجل كتير.. مابعرف مستعجل لاتزوج حب حياتي ولا مستعجل لانتقم
الجزء السادس:
طلعنا انا ومعين واخدنا امي معنا واتوجها لبيت خالي نضال
وصلنا ودقينا عالباب طولت شوي لحد ما فتحتلنا مرت خالي وصال
وصال: جيتوو؟!! اهلا وسهلا.. مو اتصلتو اعتذرتو.. اتفضلوو اتفضلو
ام معين: والله هاد قيس رح يجنني اصر انو ما نأجل الموضوع ونيجي هلء
قيس: آسفين عالتأخير بس صديق الي توفى وما قدرت ما روح
وصال: حصل خير فوتو لنادي رغد وخالك
..
انا كنت بغرفتي وما شلحت تيابي بقيت متل ما انا.. كان قلبي حاسسني رح ييجي قيس بأي وقت
وصال: رغد رغد قوومي قيس وعمتك ومعين اجو
كنت غفياني شوي بس لما خبرتني امي انهن هون قمت نط عن السرير
رغد: هوون؟؟ متى اجووو؟؟ موو قالو مابدهن ييجو
وصال: مابعرف ليكهن اجو خليكي متل ما انتي الحقيني انا رايحة خبر ابوكي وننزل لتحت لا تتأخري
وقفت عالمرايي اطلعت بحالي ورتبت تيابي وشعراتي
حطيت ايدي ع قلبي كان عم يدق كتتيير وبشكل قوي
كان متل يلي عم يقلي اتراجعي ماتخطي هالخطورة.. اتجاهلت احساسي
ضليت حاول اخد نفسي لحتى ارتحت شوي
وبعدا نزلت لتحت
كانت امي وابي قاعدين بجهة وعمتي ومعين بجهة قبالهن
وقيس بالوسط كان متل الامير
كان وسيم كتير وحلو
سلمت عليهن وقعدت
اطلعت ب قيس بس ماكان عم يطلع فيني ابداً.. يمكن متوتر او خجلان مابعرف
بدت عمتي تعاتب ابي وكلنا كنا ساكتين وعم نسمعهن
ام معين: لك هان عليك تقطعني كل هالمدة.. لولا هالولد حب بنتك وجينا نطلبها كان ما اتقابلنا ايه
نضال: اختي ما تزعلي مني بس انا..
ام معين: بعرف اخي بعرف انه بسبب موت بنتي.. انا خبرتك بنتي الله يرحمها وماتت بالعملية بعرف انك ما قدرت توقف النزيف يلي صابها من الحادث وخبرتك اكتر من مرة هالشي ارادة ربنا.. انا مابدي نضل العمر هيك خلينا نطوي هالصفحة اخي
نضال: ان شاء الله اختي
قيس: اي امي ما تقلقي رح تنطوي هالصفحة عن قريب
الكل انتبه لجملة قيس يلي كان فيها نوع من التهديد
انا كنت عم اطلع بقيس يلي كانت عيونه فيها شرار.. ما كانت عيونه عم تلمع متل كل مرة.. ما شفت فيها لمعة الحنان والحب يلي كنت شوفها كل يوم ..
مشي اليوم بتوتر وتشاحن كبير.. بس بالنهاية مشي ع خير.. قيس طلبني من ابي وطلب نكتب الكتاب ونتزوج ع طول ما حب نطول وابي ما عارض ابداً
واتفقنا ع كل شي وتاني نهار طلعنا سوا ل نكتب الكتاب انا وابي وقيس ومعين
كتبتنا كتابنا وبلشت اجمل لحظات حياتي مع اغلى انسان ع قلبي
قيس كان بكامل حنيته وحبه
كنت كل يوم روح لعندهن اقعد مع عمتي
وكنا نطلع اوقات انا وقيس سوا.. بس ما كان يقبل ييجي لعنا عالبيت ابداً وكنت كتير اتزاعل معه لهالسبب
كنا قاعدين سوا وكان قيس ساكت كالعادة وسرحان كان فيه شي متغير
رغد: قيس شو بك متغير.. من وقت يلي خطبنا وانت ع طول شارد وعم تفكر
قيس: ما في شي بس امور شغل ماتاكلي هم
كانت فترة خطوبتنا قصيرة ما عدت الشهر بس كانت حلوة بكل تفاصيلا.. رغم حزن قيس يلي كنت لاحظه بس كنت مكتفية بإني موجودة معه
قرب موعد فرحي وكنت عم اتوتر كتير ودايما كون مو مرتاحة بس حاكي وطمن حالي بانه توتر متل كل عروس مو اكتر
يوم الفرح في بيت قيس..
معين: لك قيس يلا ليكنا جهزنا خلينا نطلع عم يستنوك برا
قيس: ليكني خلصت اخي
روحو انتو انا هلء لاحقكن
معين: ما بدة تطلع معنا
قيس: لك لا رح جيب رغد من الصالون وبعدا نلحقكن عالصالة روحو انتو
طلع معين وقعدت اطلع بحالي وابكي اتدايقت كتير ما كنت بعرف انا عم بعم الصح بزواجي من رغد.. معقول فيني اتزوجها واكسر قلبا وخليهن يتحسرو عليها
معقول فيني احرمهن منه..
لا مافيني
الجزء السابع:
انا وامي كنا بالكوافير
كنت عم اطلع ع حالي وانا بالفستان الابيض.. حلم كل صبية.. حلمي يلي كنت احلمو من سنين
انا وقيس اليوم رح نكون ببيت واحد.. رح نعيش العمر كله سوا
جهزتني الكوافير وبقيت انطر قيس لييجي ياخدني ع الصالة
قعت انا وامي ننطر
كانت الساعة 4.. مشيت لل 5.. بعدا 6 وبعدا 7 وقيس لسا ما اجا والموبايل ما وقف اتصالات
نطرنا ساعة وتنين وتلاتة وقيس ما عم يرد ع موبايله دقتله كتير بس مارد
دوره عليه كتير
معين ما عم يلاقيه
بابا ما عم يلاقيه
اختفى
ما بعرف وينه ولا شو صرله بس اختفى
اختفى يوم فرحنا..
الناس اجو يخبرو ابي ومعين قالو انهن شافوه عم يهرب وقت الزفة
رغد: يهرب؟!!
يهرب من الفرح؟! مابدو يتزوجني
تراجع؟!
لوين هرب وليه
ليه تركني بنص الطريق.. ليه مشي معي الطريق مادام ما بدو يكمل
كنت عم اسال حالي الف سؤال ومو لاقية اي اجابة
انا لساتي قاعدة بالكوافير الساعة 9 المسا
الكوافير بدت تعتذر بدا تقفل المحل
وصال: ياامي ياروحي خلص قومي نروح عالبيت
رغد: عالبيت؟! انو بييييت ياامي؟ بيتي انا وقيس ولا بيت اهلي
انا ما بدي روح.. قيس رح ييجي هلء رح ييجي بكون تأخر متل يوم ما خطبني
اكيد في عذر
اكيد
وصال: يا ماما بكفيي حاج تبكي الله يرضى عليكي ياامي قيس هرب ما رح ييجي خلينا نرجع عالبيت ابوكي عم ينطرنا برا
طلعت من الصالون وانا عم اسند ع امي ماني مستوعبة ليه هيك صار وينه قيس
طلعت برا لقيت ابي واقف عم ينطرني
اطلعت فيه وتجمعو الدموع بعيوني
نضال: تعي ياروح بابا والله لحاسبه والله لخليه يندم يا بابا بس ماتبكي
رجعنا عالبيت شلحت الفستان ورميته عالارض.. فكيت شعراتي وغسلت وشي ورميت حالي عالسرير
ضليت ابكي
بكييت كتير
حرقلي قلبي حرقلي قلبي وروحي
خلا الناس كلا تحكي عليي
العروس يلي تركها عريسا وهرب
رغد: الله يسامحك ياقيس الله يسامحك
مرق اسبوع ونحنا ما بنعرف شي عن قيس.. حتى عمتي ومعين ما عرفو عنه شي
سألو المخافر والمستشفيات وما كان لقيس اي اثر
نفسيتي تعبت كتير ما كنت اطلع من غرفتي وما كنت قابل حد حتى عمتي كانت تسال عني كل يوم ما كنت روح لعندا ابداً .. كنت تعبانة كتير وموجووعة
ومشتاقة لقيس.. ومجروحة منه.. وخايفة عليه
الاعاصير لساتها جوات قلبي عم تدور وتدور
بعد ما مر اسبوعين دق باب البيت بقوة كبيرة
كنت بغرفتي لما سمعت صوت ابي عم يصرخ ويخانق نقز قلبي وركزت ع صوتهن
سمعت صوت قيس
ايه هاد صوت قيس هوا الي عم يخانق مع ابي
طلعت من غرفتي ونزلت اركض لتحت
لقيت قيس جاي هوي ومعين وعمتي
وابي هاجم عليه عم يخانق فيه
نضال: يا حقير ياوسخ لك كيف بتعمل في بنتي هيك كييف ليه هربت وتركتا يوم فرحكن
معين: خالي اتركه شوي خلينا نقعد كلياتنا ونفهم شو يلي صار
نزلت ركض ووصلت لعند قيس
اطلعت بعيونه
ماكان هاممني حد قد ماهمني اعرف ليه عمل فيني هيك
رغد: كيف عملت فيني هيك
ليش عملت هيك
وين كنت.. ليه هربت وتركتني
جاااااوبني
وصال: اهدي امي اهدي بترجاكن اقعدو خلينا نفهم شو الي عم يصير
قيس: خلي خالي يفهمكن شو الي عم يصير
نضال: شوو فهمهن انت شو عم تحكي
قيس: بتحب احكي انا يا خاالي اخو امي
ولا بتحب انت تخبرهن
ام معين: يخبرنا بشو امي شو فيه
نضال: انت شو عم تحكي ولاااا
قيس: اي خلص لا تعصب خال
انا رح خبرهن
الجزء الثامن:
قيس: انا رح احكيلكن كل شي
بتعرف ياخالي ليه اتاخرت عليكن يوم ماكنت جاي اطلب ايد رغد
كنت عند رفيقك الدكتور توفيق
نضال: شو!!
قيس: ايه متل ما عم تسمع اتصل فيني كان عم يموت وينازع.. ضميره كان عم يعذبه.. اتصل فيني ليعترف بعملتكن حتى سامحه
نضال: انت شوو عم تحكي اطلاع برا بيتي
قيس: ما رح اطلع حتى اكشف حقيقتك
بدي اكشف الي خبيتو عنا سنين
معين: شو عم تحكي اخي
قيس: خاالك يلي بيكون اخو امك..خاالك يلي كان السبب بموت اختي
ام معين: انت شوو عم تحكي قيس
قيس: اي امي بعرف ما رح تتحملي يلي رح قولو بس لازم تعرفي الحقيقة لازم تعرفي ليه كل هالسنين خالي كان يتهرب منك ويبعد عنك
لانه خايف كان خايف يطلع بعيونك بعد الي عملو
رغد: اخررس قيس واطلاع براا ماتحكي عن ابي هيك
قيس: ما رح اطلع لتسمعوني كلكن
انا كنت عند الدكتور توفيق يلي شارك خالي بعملية اختي
وقت صار معها الحادث وكان معا نزيف بالمخ.. ما بتتذكري وقتها مين كان مريض
ايه امي؟؟؟ مابتتذكري رغد لما كانت عم تعاني ثقب كبير بالقلب وكانت بحاجة زراعة قلب
مااستغربتي منين جابو قلب وعملت عملية فجأة بيوم وليلة
اخوكي ياامي اخوكي اخد قلبا لبنتك حتى ينقذ بنتو
اخوكي استغل النزيف يلي صار لبنتك واخد قلبها لما ماتت
نضال: ماتصدقوه عم يكذب عم يكذب
قيس: توفيق اعطاني كل الملفات يلي كنتو خافيينها مافيك تنكررر شي
رغد: هالحكي صحييح بابا!!!
نضال: انا انا كنت رح خبركن.. هيا ماتت ماتت لهيك اخدت القلب والله بعد ما ماتت
قيس: ماااتكذب.. كان فيكو تنقذووها
خبرني توفيق انه كان فيكو توقفو النزيف وتنقذوها
بس انت رفعت ايدك وخليتو يرفعا معك
تركتوها تموت
واخدتو قلبا لتزرعوه لبنتك
ياقاتل
انا كنت غايب كل هالوقت لاثبت جرمك
انا فتحت كل الملفات وسلمت كل شي للشرطة
ام معين: حسبي الله ونعم الوكيل فيك يانضال
حسبي الله ونعم الوكيل فيك
ليش عملت هيك
لك قتلت بنتي
كان فيك تنقذها وتركتا تموووت
لك خليتني افقد بنتي وانشل بسبب موتا وانت كنت عم تتفرج
لك انت مو اخي انت شيطاان
حسبي الله عليك
الجزء التاسع:
معين: اهدي اهدي امي الله يخليكي ليصيرلك شي
والله لناخد حق اخي بس اهدي
قيس: انا اخدته حق اختي.. انت مصيرك الحبوس.. انت حرام تكون دكتور انت لازم يعدموك
نضال: اناا اسسف سامحووني والله ندمااان والله ندماان
طول هالسنين كنت عم اتعذب ع الي عملتو
والله ندمان وما تهنيت يوم بسبب يلي عملتو
وصال: ندماان.. لك انا مو مصدقة يلي عم اسمعو
انت كيف بتعمل هيك باختك وببنتا كييف بتعمل هيك
انت بتعرف شو عملت
..
رغد: وانا.. وانا وين موقعي بالي عم يصير
كنت عم اسمع فيهن ومو قادرة انطق بشي
رغد: لحتى انا اعيش ماتت بنت عمتي
انا اخدت قلبا وزرعتوه بجسمي
انا مين هلء
انا رغد ولا اسما
مين انا
لك كيف عملت فيني هيك يا بابا.. ما لقيت غير بنت عمتي
طب انا هلء شو
انا مذنبة ولا ضحية
لك احكييي بابا ميين انا هلء
احكي قيس مين انا
هلء هاد الي جواتي قلب اختك؟!
وطول الوقت وانا عم قول شو هالاعصار يلي جواتي
عم قول ليه عم حب عمتي اكتر من امي
كنت طول الوقت حس انه في شي جواتي مو الي
لهيك تركتني يوم فرحي ياقيس.. لتنتقم؟ .. لتكسر قلبي
قيس: انا ما عملت شي بالعكس انا لما تركتك ومااتزوجتك كنت عم ارحمك من الانتقام.. كنت بدي اقتلك واحرق قلب ابوكي عليكي متل ما حرق قلبنا ع اختي
كنت بدي اقتلك لانك ما بتستحقي القلب يلي عايش جواتك
بس اكتشفت انه مافيني انتقم واقتل انا موو متل ابوكي
لهيك تركتك وهربت من الفرح.. انا بهروبي رحمتك من الموت يارغد
كان عم يموتني بكلامو. كان عم يقتلني.. وقتلني اكتر لما قرب عليي واشر بأصبعو ع قلبي
قيس: هاد مو الك.. هاد مو من حقك.. هاد قلب اختي
..
يلا يا امي يلا معين خلونا نطلع الشرطة بالطريق
أخدت امي ومعين وطلعنا من بيت خالي كانت امي منهارة ومو قادرة تستوعب شي..
رجعنا عالبيت وما حكينا شي بالي صار.. بعدا سمعنا صوت سيارات الشرطة وعرفنا وقتا انهن اخدوه خالي
مر تلات ايام علي صار وامي لحد هلء ما حكت شي بالعافية بتاكل وبتشرب.. خفت كتير عليها
حاولت حاكيها بس كانت تتجاهلني وتلف ظهرا وتنام
ونحنا قاعدين انا ومعين وامي عم نتعشى دق حدا عالباب
قام معين فتح وفاتت معه مرت خالي وصال
قيس: انتي شو جابك لهون مرت خالي
ام معين: قيس امي خليها تتفضل
معين: تفضلي ارتاحي
وصال: انا بعرف يلي صار مو قليل عليكن بنوب.. انا ورغد ما كنا بنعرف ايا شي.. نضال اخدوه الشرطة ليلتها وفتحو كل ملفات القضية وبدهن يحاكمون
الي عملو نضال ما بينغفر والله بعرف
بس رغد ما لها ذنب بشي.. انا خايفة عليها.. لا عم تاكل ولا عم تشرب ما عم تطلع من غرفتا بنوب ما بشوفا وع طول عم تصرخ وتخبط بحالا بترجاكن اعملو شي.. ام معين انتي بتحبي رغد هي متل بنتك هي حاملة قلبا لبنتك لا تتركيها تموت
معين: بعيد الشر عنها مرة خالي بعرف انه رغد ما ذنبها شي وانا كنت رح احكي معكن بهالموضوع
ام معين: ااخ ياروحي والله رغد قطعة من قلبي انا حاسة فيكي يا وصال.. هي بنتي متل ما هيا بنتك.. كنت طول الوقت حس في شي بيربطني فيها.. ماكنت متخيلة تكون حاملة قلب بنتي
والله ما كرهتا ولا حملتا الذنب انا ما رح اتركا ولا اتخلى عنا بكفي خسرت بنتي مرة ما رح اخسرا مرة تانية عم تفهم قيس
قيس:…
معين: انت جرحتا لرغد.. انت كان فيك تحل هالشي كله بطريقة تانية.. كان فيك تخبرنا من وقت ما عرفت بالقصة وكنا تصرفنا سوا.. ليش هيك عملت برغد ودخلتا بالقصة
قيس: ما بعرف كنت مقهور وتعبان كتير ما كنت عم استوعب يلي عملو خالي فينا والله ماقدرت
بعرف انه رغد كانت طفلة صغيرة وما ذنبا بالي صار.. انا رح صلح كل شي
الجزء العاشر والاخير :
بعد مرور سنة واحدة..
كنت قاعدة بغرفتي وعم البس تيابي حتى روح ع جامعتي لاول مرة من بعد يلي صار.. حولت تخصصي ولغيت الطب من حياتي كلها..وبدي ادرس لغة عربية
كلهن رجعو لحياتهن الطبيعية الا انا
امي عم تقضي وقتا شوي بالبيت وشوي عم تشتغل بأملاكنا وشوي بتزور ابي
وابي انحكم بالسجن بسبب جرمه
عمتي صحتها عم تتحسن متل ما عم تخبرني امي.. وكل يوم بتطلب تشوفني بس انا مو قادرة قابل حد
قيس من بعد يلي صار حاول كتير ييجي لعندي حاول كتير يصلح يلي عملو
بس ما قدرت سامحو
بعرف انه ابي عمل جريمة بحقهن.. بس انا شو ذنبي
ليه دخلني بلعبة وسخة وطلعني منها مكسورة ومجروحة
ماقدرت انسى اني عايشة بقلب مو من حقي متل ما خبرني قيس
فاتت امي لعندي بعد ما خلصت لبس
وصال: رايحة عالجامعة امي..
رغد: اي خلص امي حاج ضيع وقت
وصال: خير ما عملتي ياروحي
مو ناوية تروحي لعند عمتك والله كل يوم بتبكي ونفسا تشوفك
رغد: اخ ياامي والله مو قادرة موو قادرة شوفها كيف بدي قابلها بعد يلي صار كيف بدي اطلع فيها وانا ماخدة قلب بنتا
وصال: ياامي خلص والله خبرتك للمرة الالف انتي ما ذنبك خلص حاج تلومي حالك الله يسامحو ابوكي هوا السبب بكل شي
رغد: خلص امي انا طالعة بشوفك بعدين
طلعت من بيتنا وصرت اطلع حواليي يا الله الي وقت طويل ما طلعت من البيت وما شفت هالطريق
كنت عم امشي واطلع بالارض وقت خبطت بشخص قدامي
رغد: قيس؟!
قيس: اي قيس.. ناوية تخليني موت قبل ما شوفك
رغد: لو سمحت رح اتاخر ع جامعتي عن اذنك
حاولت اتهرب منه بس ما قدرت سحبني من ايدي ورجعني لعنده
قيس: الي سنة عم انطر فيكي كل يووم.. مافي تهربي مني هلء صار لازم تواجهيني
حضني بقووة كبيرة كسرلي ضلوعي وصار يبكي
انفجرت بالبكي.. انفجرت بعد ما كنت مكبوتة من جوا
رغد: شووو بدك قيس شوو بدك مني بترجااك خلص بكفي يلي سمعتوو منك
بدك هالقلب؟! بتحب انزعو واعطيك اياه
ها خوود خوود بدي ريحك وارتاح
قيس: رغد رغد اهدي بحياتي اهدي
والله انا اسف اسسف بترجاكي سامحيني انا وقتا كنت موجوع من الي صار ما قصدت شي من الي قلته
اطلعي فيني اطلعي بعيوني انا بحبك وندمان والله ندمان لاني تركتك
ماكان لازم خليكي تتحملي ذنب ابوكي سامحيني
تعي شوفي امي قومي والله رح تطق وتشووفك
هداني قيس شوي واخدني ع بيتهن
فتت لجوا البيت وكإني اول مرة فوتها
كانت عمتي قاعدة عالسرير وعم تقرأ قرآن اول ما شافتني حطت المصحف جنبا وصفنت فيني
وانا صفنت فيها
ما لقيتا والا قامت عن السرير.. ايه قامت وكانت عم تتوجه لعندي
حسيت كإني عم بحلم لما شفتا عم تمشي شوي شوي
قيس: امي امي عم تمشي
ام معين: رغد رغد ياروحي تعي لهون تعي ياكلبة.. لك هان عليكي تتركيني كل هالوقت وما تطلي عليي
رغد: سامحيني ياعمتي سامحيني يا الله شو اشتقتلك ياعمتي
بقيت انا وعمتي حاضنين بعض ونبكي.. نبكي من الاشتياق ومن الفرحة لانا مشيت
لما شفت عمتي عم تمشي حسيت براحة كبيرة.. مشيت بسببي.. مشيت لانا شافتني
حسيت كاني رجعلتا بنتا لعندا
شوفتا بتمشي نستني كل شي صار معنا من قبل
تصالحنا كلياتنا وحاولنا ننسى الشي يلي صار معنا
انا سامحت قيس وعذرته ع الي عملو وما عاد حد فينا حكا بالقصة
ما كنا نشوف ابي بس امي كانت تروح تزوره كل مدة وتشوف شو محتاج
عمتي رجعت تمشي متل اول واحسن
ومعين ما تركني ع طول يساعدني ويدعمني ويخفف عني بكلامه الحنون
وانا وقيس رجعنا سوا.. بعد ما حاول كتير ليراضيني
عملنا فرح كبير كتير.. حاول يعوضني عن الي عملو فيني
حاول يسكت الناس يلي ما كانت تحكي غير بسيرتنا
اتزوجنا ونحنا هلء مبسوطين سوا
وانا.. لسا متل ما انا
جسم رغد وجواه قلب اسما
عم عيش بالاعاصير نفسا وعم حارب فيها
بحس انه جواتي قلبين قلب اسما يلي رافض يندمج فيني وقلبي يلي شرايينه لساتا متصلة بجسمي كله
في شي مزدوج جواتي ما عم اقدر ادمجه
عم حاول ادمج قلبي وجسمي سوا
عم حاول انسى انه القلب يلي جواتي مو قلبي
يمكن مع الوقت انسى .. يمكن
إنتهت…..

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق